News News

አራተኛው ዓመታዊ የመንገድ ምርምር ኮንፍረንስ ተካሄደ፡፡

አራተኛው ዓመታዊ የመንገድ ምርምር ኮንፈረንስ የመንገድ ሥራ ተቋራጮች ፣ አማካሪ ድርጅቶች እና ሌሎች ባለድርሻ አካላት በተገኙበት “Development and Delivery of Better Road Transport Infrastructure through collaborative Researches” በሚል መሪ ቃል ነሃሴ 16 ቀን 2009 ዓ.ም በሂልተን ሆቴል እንደተካሄደ የኢትዮጵያ መንገዶች ባለስልጣን የኮሙኒኬሽን ዳይሬክቶሬት አስታወቀ፡፡

የኢትዮጵያ መንገዶች ባለስልጣን በሀገራችን የመንገድ ዘርፍ ልማትን ከማሳደግ አኳያ የመንገድ ጥገና እና ግንባታን እንዲሁም የዲዛይን ሥራን በማዘመን ጊዜ እና ወጪን በቆጠበ መንገድ እንዲከናወን ለማስቻል እንዲሁም በመንገድ ግንባታ መሰረተ ልማት ዙሪያ የሚገጥሙ ችግሮችን አስቀድሞ ለመከላከል እና ችግሮች ሲከሰቱ የመፍትሄ አቅጣጫ ለማስቀመጥ የሚያስችል የመንገድ ጥናት እና ምርምር ሥራ ለማከናወን የመንገድ ምርምር ማዕከል አቋቁሞ ሥራውን በማስፈፀም ላይ ይገኛል፡፡

የመንገድ ምርምር ማዕከሉ በጥናት እና በምርምር ሥራው ረገድ የሚደረስባቸው የምርምር ሂደት እና ውጤቶችን እንዲሁም በቤተ-ሙከራና በመስክ በሚደረጉ የማቴሪያል ሙከራ (taste) ሥራዎችን የሚደገፉ እና የመንገድ መሰረተ ልማትን የሚመለከቱ አዳዲስ የቴክኖሎጂ ሽግግሮችን በሀገሪቱ ለሚገኙ የመንገድ ስራ ተቋራጮች ፣ አማካሪ ድርጅቶች እና ሌሎች ባለድርሻ አካላትን ማሳወቅ እና የልምድ ልውውጥም ማድረጉ የሀገሪቱን የመንገድ ጥገና ፣ የግንባታ ስራ ፣ የዲዛይን ጥናት እንዲሁም የፕሮጀክት ክንውንና የአፈፃፀም ጥራትን ለማሻሻል የሚጫወተው ሚና ከፍተኛ ነው፡፡

ከዚህም ባሻገር በመንገድ ምርምርና በቴክኖሎጂ ሽግግር ረገድ ከተባባሪዎች እና ባለድርሻ አካላት ጋር አብሮ በጋራ በመስራት የመንገድ ምርምር ማዕከሉ የመንገድ ምርምርና የቴክኖሎጂ ሽግግር ሥራን በተሻለና በተጠናከረ ሁኔታ ማከናወን የሚችልበት ሁኔታን የሚፈጥር ነው፡፡ የመንገድ ጥናትና ምርምር ሥራ በርካታ አዳዲስ እና የተሻሉ ግብዓቶችን የሚፈልግ እንደመሆኑ መጠን በእንዲህ ዓይነት ልውውጥና የምርምር ውጤቶችን የማሳወቅ ተግባር ለመንገድ ምርምር ማዕከሉ የሥራ ውጤታማነት ዓይነተኛ ፋይዳ ያለው ነው፡፡

በዚህ ኮንፈረንስ የተገኙ ግብዓቶች በዘርፉ ለሚደረገው የመንገድ ጥናት እና ምርምር እንዲሁም  የቴክኖሎጂ ሽግግር ሥራዎች ከፍተኛ ጠቀሜታ እና ሀገራዊ ፋይዳ የሚያስገኙ በመሆናቸው በማደግ ላይ ለሚገኘው የመንገድ መሰረተ ልማት ዘርፍ የበኩላቸውን ዓይነተኛ ሚና የሚጫወቱ ይሆናሉ፡፡ የኮንፍረንሱ ዋና ዓላማ በኢትዮጵያ መንገዶች ባለስልጣን የመንገድ ምርምር ማዕከልና በተለያዩ ዩኒቨርሲቲዎች በዋናነት በመሪ ቃሉ ዙሪያ የሚቀርቡ የጥናት ውጤቶችን ፋይዳ ለባለድርሻ አካላት በማስተዋወቅ ፣ በውይይቱ ላይ የሚሰጡ ግብረ መልሶችን ለማካተትና የምርምር ውጤቱን የማሰራጨት ሥራዎችን ለመስራት ነው፡፡ በተጨማሪም ተመሣሣይ የምርምር ውጤቶችን ለማበረታታት የሚደረገው ጥረት ተጠናክሮ እንደሚቀጥል ለተሳታፊዎች ግንዛቤ ለማስጨበጥ ነው፡፡

በኮንፈረንሱ ወቅት ከስምንት በማያነንሱ ርዕሶች ዙሪያ የተዘጋጁ የጥናትና ምርምር ስራዎች በተለያዩ ባለሙያዎች የቀረቡ ሲሆን ፣ በእነዚህ ጥናቶች ዙሪያ ሰፊ የሆነ ውይይት ተከሂዷል፡፡

በዚህም መሰረት የሃገራችንን የመንገድ ትራንስፖርት መሰረተ ልማት በተሻለ ሁኔታ ለማሳደግ እና ለማፋጠን የሚያስችል የምርምር ውጤት ላይ መድረስ አስፈላጊ እንደመሆኑ መጠን ከተሳታፊዎች ፣ ተባባሪዎችና ባለድርሻ አካላት ጋር በተደረገው የልምድ ልውውጥና ውይይት ጥሩ ግብዓት ሊገኝበት ተችሏል፤ ሲል የባለስልጣን መስሪያ ቤቱ ኮሙኒኬሽን ዳይሬክቶሬት አሳውቋል፡፡